హెచ్-1బీ వీసాలపై ట్రంప్ వైఖరిని సమర్థించిన వైట్హౌస్
మొదట విదేశీ నిపుణులకు అవకాశం.. తర్వాత అమెరికన్లకు ప్రాధాన్యం
టెక్నాలజీలో శిక్షణ ఇచ్చేందుకు విదేశీయులను స్వాగతిస్తామన్న ట్రంప్
ట్రంప్ వ్యాఖ్యలతో సొంత పార్టీలోనే తీవ్ర చర్చ
2024లో 70 శాతానికి పైగా హెచ్-1బీ వీసాలు భారతీయులకే
అమెరికా అధ్యక్షుడు డొనాల్డ్ ట్రంప్ హెచ్-1బీ వీసాల విధానంపై తీసుకున్న వైఖరిని శ్వేతసౌధం సమర్థించింది. ఈ విషయంలో ట్రంప్ అభిప్రాయం చాలా వాస్తవికంగా, వివేకంతో కూడుకున్నదని స్పష్టం చేసింది. అమెరికాలో పరిశ్రమల స్థాపనకు తొలినాళ్లలో విదేశీ నిపుణులను అనుమతించినా, అంతిమంగా ఆ ఉద్యోగాలను అమెరికన్లతోనే భర్తీ చేయాలన్నది ఆయన లక్ష్యమని పేర్కొంది.
వైట్హౌస్ ప్రెస్ సెక్రటరీ కరోలిన్ లెవిట్ మీడియాతో మాట్లాడుతూ.. ట్రంప్ అభిప్రాయంపై నెలకొన్న అపోహలను తొలగించే ప్రయత్నం చేశారు. “అమెరికాలో ట్రిలియన్ల డాలర్ల పెట్టుబడులు పెట్టే విదేశీ కంపెనీలు, బ్యాటరీల వంటి ప్రత్యేకమైన ఉత్పత్తుల కోసం తమ దేశ నిపుణులను తెచ్చుకుంటే, ఫ్యాక్టరీలు ప్రారంభమయ్యే వరకు మాత్రమే వారిని అనుమతించాలని ట్రంప్ భావిస్తున్నారు. ఆ తర్వాత ఆ ఉద్యోగాల్లో అమెరికన్లే ఉండాలన్నది ఆయన అంతిమ లక్ష్యం” అని ఆమె వివరించారు.
కొద్ది రోజుల క్రితం యూఎస్-సౌదీ ఇన్వెస్ట్మెంట్ ఫోరమ్లో ట్రంప్ చేసిన వ్యాఖ్యల నేపథ్యంలో వైట్హౌస్ ఈ వివరణ ఇచ్చింది. “అరిజోనాలో బిలియన్ల డాలర్లతో భారీ కంప్యూటర్ చిప్ ఫ్యాక్టరీని ప్రారంభించి, నిరుద్యోగ యువతతో దానిని నడపడం సాధ్యం కాదు. కంపెనీలతో పాటు వేలమంది నిపుణులను తీసుకురావాల్సి ఉంటుంది. అలాంటి వారిని నేను స్వాగతిస్తాను” అని ట్రంప్ ఆ సదస్సులో అన్నారు. ఆ విదేశీ నిపుణులు ఇక్కడికి వచ్చి, అమెరికన్లకు కంప్యూటర్ చిప్స్ తయారీ వంటి సాంకేతిక అంశాలపై శిక్షణ ఇస్తారని ఆయన తెలిపారు.
అయితే, తన వైఖరి కారణంగా సొంత పార్టీలోని కన్జర్వేటివ్ వర్గాల నుంచి కొంత వ్యతిరేకత రావొచ్చని ట్రంప్ స్వయంగా అంగీకరించారు. ఆయన వ్యాఖ్యలతో రిపబ్లికన్ పార్టీలో ఈ వీసా విధానంపై తీవ్ర చర్చ జరుగుతోంది.
కాగా, 2024లో మంజూరైన మొత్తం హెచ్-1బీ వీసాలలో 70 శాతానికి పైగా భారతీయులే పొందడం గమనార్హం. గతంలో కూడా హెచ్-1బీ వీసాల దుర్వినియోగాన్ని అరికట్టేందుకు, కొత్త దరఖాస్తులపై 100,000 డాలర్ల ఫీజు విధించడం కీలకమైన ముందడుగు అని వైట్హౌస్ వెల్లడించింది.
https://youtube.com/@trinethramnewstelugu?si=ye7yjfC_JIZpSdox
Trinethram news
Like and Subscribe
