త్రినేత్రం న్యూస్. అశ్వారావుపేట, సెప్టెంబర్ 26 (తెలంగాణం ):అశ్వారావుపేట ఆర్టీఏ చెక్ పోస్టులో ఎక్సైజ్ ఎన్ఫోర్స్మెంట్ పోలీసులు ప్రత్యేక తనిఖీలు నిర్వహించి భారీగా నల్లబెల్లం, పటిక మరియు నాటు సారాయి స్వాధీనం చేసుకున్నారు. ఈ ప్రత్యేక తనిఖీలు తెలంగాణ ఎక్సైజ్ ఎన్ఫోర్స్మెంట్ డైరెక్టర్ షానవాజ్ ఖాసీం మార్గదర్శకత్వంలో, ఉమ్మడి ఖమ్మం జిల్లా ఎక్సైజ్ డిప్యూటీ కమిషనర్ జనార్ధన్ రెడ్డి, అసిస్టెంట్ కమిషనర్ గణేశ్, ఏఈఎస్ తిరుపతి ఆదేశాల మేరకు చేపట్టబడ్డాయి. ఈ కార్యాచరణలో ఎక్సైజ్ ఎస్ఐ శ్రీహరి రావు సిబ్బందితో కలిసి పాల్గొన్నారు.
తనిఖీలలో భాగంగా ఒక టాటా ఇంట్రా పికప్ వాహనాన్ని ఆపి పరిశీలించగా, అందులో 4104 కిలోల నల్ల బెల్లం, 30 కిలోల పటిక, 10 లీటర్ల నాటు సారాయి బయటపడింది. ఈ విషయం పై మరింత దర్యాప్తు జరపగా, ఈ అక్రమ రవాణా తూర్పు గోదావరి జిల్లాకు చెందిన ముగ్గురు వ్యక్తులు నిర్వహిస్తున్నట్లు గుర్తించారు. నిందితులు కొడమంచిలి క్రాంతి, సవరపు రవి, పులిదిండి హరీశ్ (ప్రస్తుతం పరారీలో ఉన్నాడు)గా పోలీసులు తెలిపారు. వీరు ఆంధ్రప్రదేశ్లోని తణుకు నుండి భద్రాద్రి కొత్తగూడెం జిల్లా వైపు అశ్వారావుపేట గుండా నల్ల బెల్లం రవాణా చేస్తున్నట్లు విచారణలో తేలింది
స్వాధీనం చేసిన నల్లబెల్లం, పటిక, నాటు సారాయి మరియు నిందితుల వద్ద నుండి తీసుకున్న రెండు సెల్ ఫోన్లు అశ్వారావుపేట ఎక్సైజ్ స్టేషన్ కి అప్పగించబడ్డాయి. ఈ తనిఖీలలో హెడ్ కానిస్టేబుల్ కరీం, కానిస్టేబుళ్లు సుధీర్, వెంకట్, ఉపేందర్ కూడా పాల్గొని సహకారం అందించారు. ఎక్సైజ్ ఎస్ఐ శ్రీహరి రావు మాట్లాడుతూ, నల్లబెల్లం వాడకం మద్యం తయారీకి విస్తృతంగా ఉపయోగపడుతుందని, దీని రవాణా పూర్తి స్థాయి నిషేధితమని స్పష్టంచేశారు. ఈ రకమైన మత్తు పదార్థాలు సమాజానికి హానికరమని, వాటి రవాణా చేసి లాభాలు పొందాలని చూసే వ్యక్తులపై కఠిన చర్యలు తీసుకుంటామని హెచ్చరించారు.
అలాగే, నిషేధిత మత్తు పదార్థాల రవాణా లేదా నిల్వ గురించి ఎవరైనా సమాచారం అందిస్తే వారు వెంటనే టోల్ ఫ్రీ నంబర్ 1800 425 2523 కు తెలియజేయాలని ప్రజలను కోరారు. సమాచారం ఇచ్చిన వారి వివరాలను గోప్యంగా ఉంచుతామని అధికారికంగా తెలిపారు.
ఈ ఘటనతో మరోసారి ఎక్సైజ్ శాఖ కట్టుదిట్టమైన చర్యలు తీసుకుంటున్న విషయం స్పష్టమైంది. తరచూ ఇటువంటి అక్రమ రవాణాలు బయటపడుతుండటం, అక్రమ సారాయి తయారీకి పెరుగుతున్న డిమాండ్ ను సూచిస్తుందని అధికారులు భావిస్తున్నారు. ఈ నేపథ్యంలో ఎక్సైజ్ శాఖ మరింత కఠినంగా తనిఖీలు చేపట్టనుంది.
https://youtube.com/@trinethramnewstelugu?si=ye7yjfC_JIZpSdox
Trinethram news
Like and Subscribe
