ట్రంప్ ప్రకటనతో భారతీయుల్లో వణుకు.. 7.25 లక్షల మంది ఇక ఇంటికే!
అక్రమ వలసదారులను వెనక్కి పంపునున్న అమెరికా
జన్మతః పౌరసత్వ హక్కును రద్దుచేసిన డొనాల్డ్ ట్రంప్
మెక్సికో, ఎల్ సాల్వెడార్ తర్వాతి స్థానంలో ఇండియన్స్
Trinethram News : అమెరికా అధ్యక్షుడిగా బాధ్యతల చేపట్టిన వెంటనే అక్రమ వలసలపై డొనాల్డ్ ట్రంప్ చేసిన ప్రకటన లక్షల మంది విదేశీయులను ఆందోళనకు గురిచేస్తోంది. అమెరికాకు అక్రమంగా వచ్చినవారిని వెనక్కి పంపడం ఖాయమని ట్రంప్ చేసిన ప్రకటన వణికిస్తోంది. తాత్కాలిక వీసాలపై వచ్చినవారిదీ ఇదే పరిస్థితి. సరైన పత్రాల్లేకుండా అమెరికాలో నివసిస్తున్న విదేశీ పౌరుల సంఖ్య దాదాపు 1.40 కోట్లు ఉంటుందని అంచనా. వీరిలో సుమారు 7.25 లక్షల మంది భారతీయులే. మెక్సికో, ఎల్ సాల్వెడార్ పౌరుల తర్వాతి స్థానం మనోళ్లదే.
అలాగే, అమెరికాలో జన్మించిన విదేశీయులకు జన్మతః లభించే పౌరసత్వాన్ని రద్దుచేస్తూ ట్రంప్ కార్యనిర్వాహక ఉత్తర్వులు జారీచేశారు. దీనివల్ల కూడా ఎక్కువ మంది భారతీయులకే. అమెరికా జనాభాలో దాదాపు 50 లక్షల (1.47 శాతం) మంది భారతీయులు ఉండగా… వీరిలో మూడోవంతు మంది అక్కడ పుట్టినవారు. మిగతావారంతా వలసదారులు. తాత్కాలిక వీసాపై అగ్రరాజ్యానికి వెళ్లి.. గ్రీన్కార్డుకోసం వేచిచూస్తున్నవారిక పుట్టిన పిల్లలకు ఇకపై అమెరికా పౌరసత్వం లభించదు.
అక్రమ వలసలను అడ్డుకునేందుకు సరిహద్దుల్లో ఎమర్జెన్సీ విధించి.. మరిన్ని బలగాలను మోహరిస్తామని ట్రంప్ ప్రకటించారు. చట్టవిరుద్ధంగా నివసిస్తున్న విదేశీ పౌరులను అందర్నీ గుర్తించి.. వారిని తిరిగి వారి వారి దేశాలకు పంపించేందుకు ట్రంప్ యంత్రాంగం చర్యలు మొదలుపెట్టింది. ఈ విషయంలో భారత ప్రభుత్వం కూడా ట్రంప్ సర్కారుతో కలిసి పనిచేసేందుకు సిద్ధమైనట్లు తెలుస్తోంది. ట్రంప్ ఇచ్చిన హామీలకు కట్టుబడి ఉండాలని మోదీ ప్రభుత్వం భావిస్తోందని.. తత్ఫలితంగా వాణిజ్య యుద్ధాన్ని నివారించేందుకు, ట్రంప్నకు సహకరించేందుకు ఇది ముందస్తు ఆలోచన అని అంతర్జాతీయ నిపుణులు విశ్లేషిస్తున్నారు.
https://play.google.com/store/apps/details?id=com.trinethramnews.app
Trinethram news
Download App
