- రాత్రి 8 గంటలకు ‘డిండి స్పెషల్‘ బస్సు పునరుద్ధరణ!
- చొరవ చూపిన ఎమ్మెల్యే బాలు నాయక్, డిపో మేనేజర్ సైదులు
- సమస్యను వెలుగులోకి తెచ్చిన జర్నలిస్ట్ పేర్ల మహేష్కు ప్రయాణికుల కృతజ్ఞతలు
దేవరకొండ డివిజన్ జనవరి 01 త్రినేత్రం న్యూస్ :దేవరకొండ నియోజకవర్గంలోని డిండి ప్రాంత ప్రయాణికుల చిరకాల వాంఛ ఎట్టకేలకు నెరవేరింది. గత కొంతకాలంగా రాత్రి వేళల్లో బస్సు సౌకర్యం లేక ప్రయాణికులు పడుతున్న అవస్థలను గుర్తించిన ఆర్టీసీ అధికారులు, పాత వేళల ప్రకారం రాత్రి 8:00 గంటలకు బస్సును పునరుద్ధరిస్తూ నిర్ణయం తీసుకున్నారు.
సమస్య నేపథ్యం:
దేవరకొండ పట్టణంలో వివిధ వృత్తుల్లో పనిచేసే వర్కర్లు, కూలీలు, చిన్న వ్యాపారులు ప్రతిరోజూ రాత్రి 7:30 గంటల వరకు పని చేస్తారు. గతంలో సాయంత్రం 6:30 గంటలకే డిండి బస్సు వెళ్ళిపోవడంతో, పని ముగించుకున్న వారు ఇంటికి వెళ్లడానికి తీవ్ర ఇబ్బందులు పడేవారు. అటు హైదరాబాద్ నుండి ఆలస్యంగా వచ్చే ప్రయాణికులు సైతం బస్సులు లేక బస్టాండ్లో పడిగాపులు కాయాల్సి వచ్చేది. ఈ విషయంలో గతంలో పలుమార్లు అధికారులతో వాగ్వాదాలు జరిగినప్పటికీ ఫలితం లేకపోయింది.
జర్నలిస్ట్ పోరాటం – ఎమ్మెల్యే స్పందన:
ప్రయాణికుల కష్టాలను స్వయంగా చూసిన జర్నలిస్ట్ పేర్ల మహేష్ ఈ సమస్యపై ప్రత్యేక దృష్టి సారించారు. ఆయన ఈ విషయాన్ని స్థానిక ఎమ్మెల్యే బాలు నాయక్ దృష్టికి, అలాగే దేవరకొండ ఆర్టీసీ డిఎం (డీ ఎం) సైదులు దృష్టికి తీసుకెళ్లారు. గతంలో ఉన్న విధంగానే రాత్రి 8 గంటలకు ‘డిండి స్పెషల్’ బస్సు నడపాలని, పేద ప్రజల ఇబ్బందులు తొలగించాలని ఆయన చేసిన నిరంతర పోరాటం చివరకు ఫలించింది.
హర్షం వ్యక్తం చేస్తున్న ప్రయాణికులు:
ఎమ్మెల్యే బాలు నాయక్ ఆదేశాలతో డిపో మేనేజర్ సైదులు ట్రాఫిక్ గైడెన్స్ ఇన్ఛార్జ్ వాలియా నాయక్ బస్సు వేళలను సవరిస్తూ నిర్ణయం తీసుకున్నారు. నూతన సంవత్సరం సందర్భంగా ఈ తీపి కబురు అందడంతో డిండి మార్గంలో ప్రయాణించే వారు అధికారులకు, ఎమ్మెల్యే కి నూతన సంవత్సర శుభాకాంక్షలు తెలిపారు. ముఖ్యంగా తమ సమస్యను అధికారుల దాకా తీసుకెళ్లి పరిష్కరించిన జర్నలిస్ట్ పేర్ల మహేష్కు ప్రయాణికులు ప్రత్యేక కృతజ్ఞతలు తెలియజేశారు.
https://youtube.com/@trinethramnewstelugu?si=ye7yjfC_JIZpSdox
Trinethram news
Like and Subscribe
